Hausla Imtihan Se Nikla

hausla imtihan se nikla

jaan ka kaam jaan se nikla

dard-e-dil un ke kaan tak pahuncha

baat ban kar zaban se nikla

bevafa.i men vo zamin vaala

haath bhar asman se nikla

harf-e-matlab faqat kaha na gaya

varna sab kuchh zaban se nikla

kuchh ki kuchh kaun sunne vaala tha

kuchh ka kuchh kyuun zaban se nikla

ik sitam miT gaya to aur hua

asman asman se nikla

jis se bachta tha main dam-e-iz.har

vahi pahlu bayan se nikla

vo bhi arman kya jo ai ‘muztar’

dil men rah kar zaban se nikla