Saleem Shahid
huun main bhi vahi mera muqabil bhi vahi hai
patthar bhi vahi a.ina-e-dil bhi vahi hai
majbur huun main ab-o-hava hai miri muḳhtar
jo lala-o-gul ki hai miri gul bhi vahi hai
jaise vo kisi a.ina-ḳhana men makin ho
paikar bhi vahi aks vahi zil bhi vahi hai
ye ḳhvab ka aalam hai ki lamhat hain sakit
main ab bhi vahin baiTha huun mahfil bhi vahi hai
kis fikr men ho ghar ki taraf lauT bhi jaao
jo nuqta-e-aghaz hai manzil bhi vahi hai
jis ne mujhe parvaz ye amada kiya tha
kya kiije ki ab raah men haa.il bhi vahi hai
‘shahid’ hain abhi kohar ke badal jo kabhi the
aur barf ki siine pe abhi sil bhi vahi hai
Leave a Reply