Zafar Ansari Zafar
har ik shai ishtihari ho ga.i hai
ye duniya karobari ho ga.i hai
mire dil men jo thi vo baat ab to
mire honTon pe jaari ho ga.i hai
sitam jhele hain itne agahi ke
ajab halat hamari ho ga.i hai
tiri yadon ke sadqe vaj.h-e-rahat
shab-e-aḳhtar-shumari ho ga.i hai
ka.i din se ye kaisi be-ḳhudi si
dil-e-muztar pe taari ho ga.i hai
ye mumkin hi nahin tanha rahun main
gham-e-janan se yaari ho ga.i hai
ye teri aarzu teri tamanna
bhala kyuun vaj.h-e-ḳhvari ho ga.i hai
Leave a Reply