avvalan us be-nishan aur ba-nishan ko ishq hai
baad-azan sar halqa-e-paigham-baran ko ishq hai
la-fata-illa-ali hai shaan men jis ki nuzul
dostan us shah-e-mardan se javan ko ishq hai
phir jo hai bagh-e-nabuvvat aur imamat ki bahar
ghuncha-e-gul sabza-e-ambar-fishan ko ishq hai
arsh o kursi huur o ghilman aur malaek khaas o aam
alam-e-bala ke sab bashindagan ko ishq hai
hain jo ye chaudah tabaq mutharrik o sakin sada
be-sukhan un sab zamin-o-asman ko ishq hai
mukhtalif hain aur mile rahte hain baham roz-o-shab
khaak baad o atish o ab-e-ravan ko ishq hai
hai jahan men jin se raushan adl ke ghar ka charagh
dam-ba-dam un badshahan-e-jahan ko ishq hai
aur khurasan asfahan iran aur turan ko
phir hamare gulshan-e-hindostan ko ishq hai
hain jahan tak silsile fuqara ke az-kah-ta-bah-mah
arifan aur kamilan aur ashiqan ko ishq hai
koh tharrate hain larzen hain zamin o asman
ashiq-e-maula ki fariyad-o-fughan ko ishq hai
har taraf gulzar hai sabzan aur ab-e-ravan
apni nazron men bahar-e-gul-fashan ko ishq hai
vo jo hain is gulshan-e-hasti men ab mahv-e-fana
un ke aage mausam-e-bad-e-khizan ko ishq hai
gard ke manind phirti hain padi udti kharab
lut gai dast-e-junun ki karvan ko ishq hai
lotte hain mast mai-khane ke dar par ja-ba-ja
jaam o sahba saaqi o pir-e-mughan ko ishq hai
kal hi naqsh-e-zaiqa sun kar bhi ham aamil rahe
ai azizan is hayat-e-raegan ko ishq hai
khilqat-e-kaunain men kya jin o kya insan ‘nazir’
vahshi o taair zaban o be-zaban ko ishq hai