Arsh Malsiyani
vo vafa-o-mehr ki dastan tujhe yaad ho ki na yaad ho
kabhi tu bhi tha mira mehrban tujhe yaad ho ki na yaad ho
tire lutf-e-ḳhas ne jo diya tiri yaad ne jo ata kiya
gham-e-mustaqil gham-e-javedan tujhe yaad ho ki na yaad ho
vo jo shor-e-lutf-e-suḳhan raha vo jo zor-e-lutf-e-bayan raha
mire ham-suḳhan mire ham-zaban tujhe yaad ho ki na yaad ho
jo tire liye mire dil men tha jo mire liye tire dil men tha
mujhe yaad hai vo gham-e-nihan tujhe yaad ho ki na yaad ho
tiri dosti pe mira yaqin mujhe yaad hai mire ham-nashin
miri dosti pe tira guman tujhe yaad ho ki na yaad ho
vo karam-shi.ari-e-dushmanan vo sitam-tarazi-e-dostan
mire nukta-ras mire nukta-dan tujhe yaad ho ki na yaad ho
vo jo shaḳh-e-gul pe tha ashiyan jo tha vaj.h-e-nazish-e-gulistan
giri jis pe barq-e-sharar-fashan tujhe yaad ho ki na yaad ho
mire dil ke jazba-e-garm men mire dil ke gosha-e-narm men
tha tira maqam kahan kahan tujhe yaad ho ki na yaad ho
use manta huun main mehrban hain tire rafiq bahut yahan
kabhi main bhi tha tira raz-dan tujhe yaad ho ki na yaad ho
ye jo ‘arsh’ shikva-taraz hai jise harza-goi pe naaz hai
ye vahi hai sha.ir-e-ḳhush-bayan tujhe yaad ho ki na yaad ho
Leave a Reply