hai saara lams ka fitna havas pagal hain
ḳhuda ka shukr ki chehra-shanas pagal hain
tumhare shahr men pagal vo hain jo hanste hain
hamare shahr men saare udaas pagal hain
vo mujh men paani piyegi nahin nahin mujh men
jhagaḌ rahe hain musalsal gilas pagal hain
shu.ur vaale hi goli chalana jante hain
main mutma.in huun mire as-pas pagal hain
mujhe samajhne ki manzil hai muntazir un ki
yaqini baat hai pagal ki aas pagal hain
main un se puchhunga jannat hain bechte kaise
mujhe navaz agar tere paas pagal hain
vo apni sadiyon ko tishna-dahan bana.e ga.e
bujha rahe hain jo lamhon ki pyaas pagal hain
hamari vaqt se banti to kis tarah banti
mizaj-e-vaqt ko aate hi raas pagal hain
tumhare ba.ad siyanon ka haal kya hoga
tumhare ba.ad yahan par udaas pagal hain
libas valon se baḌh kar haya hai ankhon men
hamari ankhon men kuchh be-libas pagal hain
tujhe sata.enge jab tak tiri raza hogi
ham har tarah se tabi.at-shanas pagal hain
tumhare ahd ke sau se hain mohtaram ‘kazim’
hamare ahd men jo ki pachas pagal hain
Leave a Reply