Aftab Iqbal Shamim
jab vo iqrar-e-ashnai kare
gul kaf-e-shakh ko hinai kare
jis ko kam kam niyaz-e-jan ho nasib
koi iqdam-e-intihai kare
phir se talif-e-dil ho phir koi
is sahife ki ru-numai kare
sheva-e-ahl-e-dil yahi hai ki tu
baiat-e-dast-e-na-rasai kare
dil men shauq-e-nabard hai itna
har hazimat mujhe rajai kare
qurb men jab ana ki duuri ho
koi kyuun khvahish-e-judai kare
Leave a Reply