Bahut ghuTan Hai Yahan Par Koi Bacha Le Mujhe

bahut ghuTan hai yahāñ par koī bachā le mujhe

maiñ apnī zaat meñ madfūn huuñ nikāle mujhe

ham aadmī haiñ bahaknā hamārī fitrat hai

bahak rahā huuñ agar maiñ koī sambhāle mujhe

ki harf-e-haq to adā ho gayā hai hoñToñ se

zamāna chāhe to neze pe ab uchhāle mujhe

ḳhudā kare ki mayassar tirā visāl na ho

bahut aziiz haiñ ye hijr ke ujāle mujhe

Leave a Comment