Hamidi Kashmiri
aa.e mashriq se shahsavar bahut
kis ko tha un ka intizar bahut
qafilon ki koi ḳhabar si nahin
duur uThta raha ghubar bahut
sub.h hone tak us ne jaan na di
umr bhar tha ḳhud-iḳhtiyar bahut
phir koi saneha hua hoga
mehrban kyuun hain gham-gusar bahut
kyuun hai har zarra karbala-manzar
hai hamen un pe e’tibar bahut
ho ga.i sab ke aage rusva.i
kis hunar par tha iftiḳhar bahut
Leave a Reply