Ehsan Danish
umr-e-rafta ki kahani kya hai
ek tohmat hai javani kya hai
mere ashkon ki ravani dekhi
tere ḳhanjar ki ravani kya hai
tere mahbub tabassum ka javab
meri ashufta-bayani kya hai
raat rote hue guzregi zarur
varna ye dil pe girani kya hai
dushman-e-zist pe jaan deta huun
aur jiine ki nishani kya hai
haath men tegh hai bal chitvan par
aaj ye aap ne Thani kya hai
ahd-e-piri men rulati hai lahu
haa.e kambaḳht javani kya hai
ek mauhum sa tufan-e-ḳhudi
kuchh nahin josh-e-javani kya hai
Leave a Reply