haath diya is ne mire haath men
main to vali ban gaya ik raat men
ishq karoge to kamaoge naam
tohmaten batti nahin khairat men
ishq buri shai sahi par dosto
dakhl na do tum miri har baat men
mujh pe tavajjoh hai sab afat ki
koi kashish to hai miri zaat men
rah-numa tha mira ik samri
kho gaya main shahr-e-tilismat men
mujh ko laga aam sa ik aadmi
aaya vo jab kaam ke auqat men
shaam ki gul-rang hava kya chali
dard mahakne laga jazbat men
haath men kaghaz ki liye chhatriyan
ghar se na nikla karo barsat men
rabt badhaya na ‘qatil’ is liye
farq tha donon ke khayalat men
Leave a Reply