vo harf jo faza-e-nil-gun ki vusaton men qaid tha
vo saut jo jo hisar-e-khamushi men jalva-rez thi
sada jo kohsar ki bulandiyon pe mahv-e-khvab thi
rida-e-barf se dhaki
vo lafz jo faza ke niile anchalon se chhan ke
jazb ho raha tha
reg-zar-e-vaqt men
jo zarra zarra muntashir tha
dhundli dhundli saaton ki gard men
vo maani-e-gurez-pa
laraz raha tha jo rag-e-hayat men
vo ramz muntazir ki jo abhi nihan tha
batn-e-kaenat men
vo harf-o-saut-o-sada
vo lafz muntashir
vo ramz muntashir
vo maani-e-gurez-pa
bas ek jast men
hisar-e-khamushi ko tod kar
pighal ke mere dard-o-arzu ki aanch men
nava-o-nutq ki saaton men dhal gaya
vo abshar-e-naghma-o-nava
ki kohsar-e-sard se gira
ki gunjti guphaon se ubal pada
vo ju-e-zat
naghma-e-hayat
jo ravan-davan hai bahr-e-be-karan ki khoj men
Leave a Reply