hosh o khirad ganva ke tire intizar men
gum kar diya hai khud ko ghamon ke ghubar men
main us ke saath saath bahut duur tak gai
ab us ko chhodna bhi nahin ikhtiyar men
rang-e-hina hai aaj bhi mamnun is liye
mere lahu ka rang tha jashn-e-bahar men
ik vasl ki ghadi ko tarasti rahi sada
ik tishnagi sada rahi dil ke dayar men
har shakhs ko fareb-e-nazar ne kiya shikar
har shakhs gum hai gumbad-e-jan ke hisar men