juḌe hue hain pari-ḳhane mere kaghaz se
jo uTh rahe hain ye afsane mere kaghaz se
katarta rahta hai miqraz-e-chashm se mujh ko
banana kya hai use jaane mere kaghaz se
qalam ne nok-e-alam kya rakhi ba-chashm-e-dil
chhalakne lag ga.e paimane mere kaghaz se
raqam karun bhi to kaise main dastan-e-vafa
huruf phirte hain begane mere kaghaz se
abhi rakhi bhi nahin lau charagh par main ne
lipaT ga.e ka.i parvane mere kaghaz se
kudal-e-ḳhama se bota huun main junun ‘sarim’
so ugte rahte hain divane mere kaghaz se
Leave a Reply