aaj yuun mujh se mila hai ki ḳhafa ho jaise
us ka ye husn bhi kuchh meri ḳhata ho jaise
vahi mayusi ka aalam vahi naumidi ka rang
zindagi bhi kisi muflis ki dua ho jaise
kabhi ḳhamoshi bhi yuun bolti hai pyaar ke bol
koi ḳhamoshi men bhi naghma-sara ho jaise
harf-e-dushnam se yuun us ne navaza ham ko
ye malamat hi mohabbat ka sila ho jaise
is takalluf se sitam ham pe rava rakhta hai
ye bhi minjumla-e-adab-e-vafa ho jaise
gham-e-ayyam pe yuun ḳhush hain tire divane
gham-e-ayyam bhi ik teri ada ho jaise
bandagi ham ko to aai ki na aai lekin
husn yuun ruuTh gaya hai ki ḳhuda ho jaise
Leave a Reply