ḳhayal men tire paikar ko chuum lete hain
ham ahl-e-zarf hain patthar ko chuum lete hain
baḌha ga.e the vo izzat hamare ghar ki kabhi
is ehtiram men ham dar ko chuum lete hain
hayat-e-nau ki jhalak jo hamen dikhata hai
nazar se ham usi manzar ko chuum lete hain
gharib-ḳhane men hoti hai raushni jis se
ham us charagh-e-munavvar ko chuum lete hain
baḌa sukun hamen ghar men aa ke milta hai
ham apne bachchon ke jab sar ko chuum lete hain
Leave a Reply