Arshad Siddiqui
tire baghair gul-o-nastaran pe kya guzri
na puchh ab ke bahar-e-chaman pe kya guzri
ma.al-e-jur.at-e-mansur kuchh sahi lekin
saval ye hai ki dar-o-rasan pe kya guzri
hamin to hain ki jo barq-o-sharar se khele hain
hamin se puchh rahe ho chaman pe kya guzri
qafas men aaj ye kaise charagh raushan hain
ilahi ḳhair na jaane chaman pe kya guzri
pahunch ke manzil-e-maqsad pe ye bhi sochenge
ki shab-ravi men dil-e-rahzan pe kya guzri
mujhe shikast-e-nasheman ka gham nahin lekin
ye sochta huun ki ahl-e-chaman pe kya guzri
taraqqiyan to zamane ne kiin bahut ‘arshad’
magar batao to arbab-e-fan pe kya guzri
Leave a Reply