vo kaash vaqt ke pahre ko toḌ kar aate
jo mahv-e-ḳhvab hain un ko jhinjhoḌ kar aate
na uThti koi nigah-e-ghalat sar-e-mahfil
vo apne jalve ko ghar apne chhoḌ kar aate
udaas ankhon ko dekha to ye ḳhayal aaya
chaman ke phulon se shabnam nichoḌ kar aate
asa-e-musa kabhi haath lag gaya hota
fir.aun-e-vaqt ka sar ham bhi phoḌ kar aate
agar thi chehre pe raunaq ki aarzu un ko
musibaton ki kala.i maroḌ kar aate
udhar na niklenge vo nazar-e-bad ka ḳhadsha hai
ḳhabar ye hoti to ham ankhen phoḌ kar aate
suna ki aaj bhi danishvaron men ḳhuub machi
‘asar’ bhi aate to himmat baTor kar aate
Leave a Reply