na mohabbat na mohabbat ki ada hai yaaro
na malamat na shikayat na jafa hai yaaro
gham ki talḳhi hai magar kitna maza hai yaaro
alam-e-shauq ka aalam hi juda hai yaaro
raunaq-e-bazm bhi afsurda chali saath hi saath
kaun ba-dida-e-nam uTh ke chala hai yaaro
koi marham na mudava na kahin sidq-o-safa
ye bhi ik mere zamane ki ada hai yaaro
mere halat samajh lenge samajhne vaale
ye ḳhamoshi bhi takallum ki ada hai yaaro
niyyaten badli hain rahbar ne tasahul barta
qafila jab bhi zara ban ke chala hai yaaro
dil men zaḳhmon ki dukhan honTon pe aahon ka dhuan
zindagi bhar ki vafaon ka sila hai yaaro
jitne ehsan hain mujh par nahin bhulunga kabhi
choT jab khaa.i tumhen yaad kiya hai yaaro
miri avaz nahin saz-e-shikasta ki sada
koi samjhe to yahi bang-e-dara hai yaaro
maslahat vaqt ki mayus hi lauTi ham se
jo bhi kahna tha sar-e-dar kaha hai yaaro
ab na arman na hasrat na alam hai na ḳhushi
ham se duniya ne hamen chhin liya hai yaaro
mash.al-e-naqd-o-nazar le ke parakh lo sab ko
kaun aghraz ki chaukhaT pe jhuka hai yaaro
main ne nafrat ke shararon ki lapaT paa.i hai
milne vaala jo koi hans ke mila hai yaaro
ik vafa-kesh mohabbat ka parastar ‘qamar’
gham ke sahraon men ḳhamosh khaḌa hai yaaro
Leave a Reply