main kho gaya to shahr-e-fan men dastiyab ho gaya
yahan jo harf miT gaya vahan kitab ho gaya
vo ik nazar to kuchh na thi ki raah se bhaTak ga.i
palaT ke us ko dekhna yahi azaab ho gaya
hamari fahm-e-na-rasa ke vaste bacha hi kya
ki husn-e-ka.enat to tira naqab ho gaya
gunah mere yaad kar ke zaḳhm saare hans paḌe
lahu lahu badan mira khila gulab ho gaya
ziyan o suud miT ga.e karam pe us ke rah ga.e
hamari saari zindagi ka ye hisab ho gaya
vajud jal ke rah gaya sharar-e-la-shu.ur se
bhara paḌa makan tha khanDar ḳharab ho gaya
‘suhail’ shor-e-shahr se panah ab kahin nahin
huruf reza reza hain suḳhan ḳharab ho gaya
Leave a Reply