soch kar dekhiye kya ḳhuub nazara hoga
us ne jab rah ke mera naam pukara hoga
ham ne socha tha ki ab gham se kinara hoga
par kahan thi ye ḳhabar ishq dobara hoga
kya kahen kab se ye ummid liye baiThe hain
us ki janib se kabhi koi ishara hoga
tujh ko dekhun to koi aur nazar aata hai
tu ne us shaḳhs ko din raat guzara hoga
shahr men mujh sa koi aur bhi divana hai
hausla hijr men vo shaḳhs bhi haara hoga
kis tarah us ko basa.enge zara se dil men
sochte rahte hain jab koi hamara hoga
Leave a Reply