Ana Hawas Ki Dukanon Mein Aa Ke Baith Gai

ana havas ki dukanon men aa ke baith gai

ajiib maina hai shikron men aa ke baith gai

jaga raha hai zamana magar nahin khultin

kahan ki niind in ankhon men aa ke baith gai

vo fakhta jo mujhe dekhte hi udti thi

bade saliqe se bachchon men aa ke baith gai

tamam talkhiyan saghar men raqs karne lagin

tamam gard kitabon men aa ke baith gai

tamam shahr men mauzu-e-guftugu hai yahi

ki shahzadi ghulamon men aa ke baith gai

nahin thi dusri koi jagah bhi chhupne ki

hamari umr khilaunon men aa ke baith gai

utho ki os ki bunden jaga rahi hain tumhen

chalo ki dhuup darichon men aa ke baith gai

chali thi dekhne suraj ki bad-mizaji ko

magar ye os bhi phulon men aa ke baith gai

tujhe main kaise bataun ki shaam hote hi

udasi kamre ke taqon men aa ke baith gai

Leave a Comment