ai baghban ye jabr hai ya iḳhtiyar hai
murjha rahe hain phuul chaman men bahar hai
shayad isi ka naam gham-e-rozgar hai
vo mil ga.e to aur bhi dil be-qarar hai
main sahab-e-chaman huun mujhe e’tibar hai
sham-e-ḳhizan ke baad hi sub.h-e-bahar hai
rahbar ne qafile hi ko majbur kah diya
ab vo qadam baḌha.e jise iḳhtiyar hai
kaliyan hain zard zard faza.en hain sard sard
kuchh log kah rahe hain ye fasl-e-bahar hai
yuun to na ruk sakega sitam ka ye silsila
jo kushta-e-sitam hai vahi sharmsar hai
dekhi hain main ne baagh ki vo halaten ki ab
mere liye ḳhizan ka na hona bahar hai
sabit hua ki raunaq-e-mahfil hai koi aur
mahfil jami hui hai magar intizar hai
har sahib-e-junun ka gulistan pe haq nahin
jis ka lahu baha hai usi ki bahar hai
Leave a Reply