avargan-e-shauq sabhi ghar ke ho ga.e
ik ham hi hain ki kucha-e-dilbar ke ho ga.e
phir yuun hua ki tujh se bichhaḌna paḌa hamen
phir yuun laga ki shahr samundar ke ho ga.e
kuchh da.ere taghayyur-e-duniya ke saath saath
aaise khinche ki ek hi mehvar ke ho ga.e
us shahr ki hava men hai aisa bhi ik fusun
jis jis ko chhu ga.i sabhi patthar ke ho ga.e
suraj Dhala hi tha ki vo saa.e baḌhe ki ‘shauq’
kam qamatan-e-shahr barabar ke ho ga.e
Leave a Reply