Poet
un ko dekha to tabi.at men ravani aa.i
dil ke ujḌe hue gulshan pe javani aa.i
pyaas kya us ki bujha.enge koi ariz-o-lab
lab-e-dariya na jise pyaas bujhani aa.i
garmi-e-ranj-o-alam hi men basar ki ham ne
zindagi men to koi rut na suhani aa.i
us ka unvan tira naam hi rakkha ham ne
bhuli-bisri jo koi yaad kahani aa.i
ham mohabbat ka bhi minar bana sakte the
ham ko nafrat ki na divar girani aa.i
dekh kar us gul-e-shadab ko ik mahfil men
ba.ad muddat ke phir ik yaad purani aa.i
aarzu dil ko thi ai ‘soz’ ghazal-ḳhvani ki
raas aa.i to hamen marsiya-ḳhvani aa.i
Leave a Reply