Khushi Na Mil Saki Aankhen Meri Pur-Ab Rahin

khushi na mil saki ankhen miri pur-ab rahin

khayal-o-khvab ki baten khayal-o-khvab rahin

sahar hui na mire shahr-e-arzu men kabhi

ki mehr-e-husn ki kirnen pas-e-naqab rahin

unhi ke dam se hai qaaem vaqar-e-sajda-e-shukr

vo log jin ki sada qismaten kharab rahin

kisi ne bhi dar-e-ehsas apna va na kiya

dukhe dilon ki sadaen na kamyab rahin

sukun se rahte hain kis tarah log duniya men

mire liye to ye sansen bhi ik azaab rahin

rah-e-vafa men nigahon se ho gaiin ojhal

jo suraten miri ankhon ka intikhab rahin

base hue hain mire khvab jin men ai ‘abid’

vo bastiyan to hamesha hi zer-e-ab rahin

Leave a Comment