ḳhamosh rah ke zaval-e-suḳhan ka gham kiye jaa.en
saval ye hai ki yuun kitni der ham kiye jaa.en
ye naqsh-gar ke liye sahal bhi na ho shayad
ki ham se aur bhi is ḳhaak par raqam kiye jaa.en
ka.i guzishta zamane ka.i shikasta nujum
jo dastaras men hain lafzon men kaise zam kiye jaa.en
ye goshvare zaban ke bahut sambhal chuke
sau sher kaaT diye jaa.en ḳhvab kam kiye jaa.en
tera ḳhayal bhi aa.e to kitni der talak
ka.i ghazal mire dasht-e-dil men ram kiye jaa.en
main janta huun ye mumkin nahin magar ai dost
main chahta huun ki vo ḳhvab phir baham kiye jaa.en
hisab dil ka rakhen ham ki dahr ka ‘babar’
shumar daagh kiye jaa.en ya diram kiye jaa.en
Leave a Reply