tum bhi rahne lage khafa sahab
kahin saaya mira pada sahab
hai ye banda hi bevafa sahab
ghair aur tum bhale bhala sahab
kyuun ulajhte ho jumbish-e-lab se
khair hai main ne kya kiya sahab
kyuun lage dene khatt-e-azadi
kuchh gunah bhi ghulam ka sahab
haae ri chhed raat sun sun ke
haal mera kaha ki kya sahab
dam-e-akhir bhi tum nahin aate
bandagi ab ki main chala sahab
sitam azar zulm o jaur o jafa
jo kiya so bhala kiya sahab
kis se bigde the kis pe ghussa tha
raat tum kis pe the khafa sahab
kis ko dete the galiyan lakhon
kis ka shab zikr-e-khair tha sahab
nam-e-ishq-e-butan na lo ‘momin’
kijiye bas khuda khuda sahab