Safi Aurangabadi
ranj hai us ranj se ham ko to gham us gham se hai
jo shikayat ham ko un se hai vo un ko ham se hai
kya paḌi hai phir kisi ke vaste rota hai kyuun
abru-e-ishq apne dida-e-pur-nam se hai
jhuTe munh koi tasalli bhi nahin deta kabhi
phir ye kyuun sahab salamat apni ik aalam se hai
dushmanon ka do hi din men sab bharam khul ja.ega
un ki saari shan-o-shaukat ek mere dam se hai
haath joḌe minnaten kiin ḳhair vo to man ga.e
aur logon ko bhi ab aisi tamanna ham se hai
is mazaq-e-ḳhas ke bhi log dekhe hain kahin
aap ki bhi jan-pahchan aḳhir ik aalam se hai
sab safi’ ki ah-e-pur-be-saḳhta kahte hain vaah
us ka rona bhi magar kuchh taal se hai sam se hai
Leave a Reply