parda raha ki jalva-e-vahdat-numa hua
ghash ne ḳhabar na di mujhe kab samna hua
dushman ki dosti ka natija bura hua
ḳhanjar gale mila to mira sar juda hua
mahshar men rang-e-chehra-e-zalim hava hua
sach hai bura hua ki mira samna hua
gulshan se uTh ke mera makan dil men aa gaya
ik daagh ban gaya hai nasheman jala hua
kya tirgi liye hue aa.i shua-e-nur
dekha shab-e-firaq azal ka likha hua
ghar dil men kar chuka hai mira nauha-e-qafas
sayyad qaid hoga agar main riha hua
jab tak tha main uruuj pe tha husn-e-jan-sitan
phir kuchh ḳhabar nahin ki mire ba.ad kya hua
kahne ko musht-e-par ki asiri to thi magar
ḳhamosh ho gaya hai chaman bolta hua
tu jis men tha vo manzil-e-hasti men hai zarur
meri fana se dil mira kyuun kar fana hua
niind un ki yuun uḌi hai ki aati nahin kabhi
marne ke ba.ad ab mira nala-rasa hua
sayyad ka ghar aaj hai jaise chaman tha kal
shayad qafas ka baiThne vaala riha hua
tasvir meri umr-e-guzishta ki dekh jaao
turbat pe ik charagh hi vo bhi bujha hua
apne bhi mujh se ḳhush na rahe bagh-e-dahr men
bigḌa kiya mujhi se nasheman bana hua
chamka hai kuchh vo jalva-e-ruḳh ho ki dagh-e-ishq
donon dilon men ek na ik mubtala hua
DhunDe na mil sake mujhe zulmat men mah-o-sal
ru-e-sahar bhi chashma-e-ab-e-baqa hua
ik umr ho ga.i ki hai barish men chashm-e-tar
ab tak na koi naḳhl-e-tamanna hara hua
‘saqib’ ḳhabar na thi ki falak men hain gardishen
main aa ke dana-e-dahn-e-asiya hua
Leave a Reply