fuzul naaz uThane se baat bigḌi hai
kisi ko dil men basane se baat bigḌi hai
tha vajibi sa ta.alluq to baat achchhi thi
ta.alluqat baḌhane se baat bigḌi hai
ham iḳhtilaf ko aapas men tai na kar paa.e
kisi ko beach bulane se baat bigḌi hai
mohabbaton men takalluf bhi hai sam-e-qatil
qadam sambhal ke uThane se baat bigḌi hai
tumhare saath bigaḌne pe kuchh malal nahin
hamari ek zamane se baat bigḌi hai
faza-e-vahm dar aa.i ta.alluqat ke beach
ghaḌi ghaḌi ke fasane se baat bigḌi hai
ham apni zaat ki tardid kar nahin paa.e
ana ke zo.am men aane se baat bigḌi hai
tire baghair guzara nahin kisi surat
use ye baat batane se baat bigḌi hai
Leave a Reply