Munawwar Lakhnavi
kuchh is qadar hai pareshan nafas nafas mera
main zindagi ko ulaT duun chale jo bas mera
kahan kahan na gaya hal-e-dil sunane ko
bana na koi kahin phir bhi dad-ras mera
liye phirunga hamesha main us ki ḳhakistar
rahega saath mire jal ke bhi qafas mera
main sochta huun ma.al-e-hayat kya hoga
baja hai zabt-e-mohabbat men pesh-o-pas mera
kisi ke saath ‘munavar’ kiya ho kuchh bhi suluk
main chahta huun ki gaa.e na ka.i jas mera
Leave a Reply