Inam Sharar Ayyubi
apne pindar ko khoya nahin jaata mujh se
main jo chahun bhi to roya nahin jaata mujh se
mubtala ho mira ham-saya kisi gham men agar
jagta rahta huun soya nahin jaata mujh se
hadson men bhi rahi hai mire honTon pe hansi
gham ko ḳhushiyon men samoya nahin jaata mujh se
qissa-e-zulm men kaise likhun kab tak likkhun
ab qalam ḳhuun men Duboya nahin jaata mujh se
ek jugnu bhi to sajta nahin palkon pe ‘sharar’
ek moti bhi piroya nahin jaata mujh se
Leave a Reply