Sabir Abuhari
mujhe un se mohabbat ho chali hai
taḌapna dil ki qismat ho chali hai
adavat aur nafrat ya-ilahi
tire bandon ki fitrat ho chali hai
haqiqat thi kabhi tauqir-e-adam
magar ab to hikayat ho chali hai
karam ye bhi hai teri be-ruḳhi ka
mujhe ab ḳhud se nafrat ho chali hai
ibadat ka sila hain hur-o-ghilman
ibadat bhi tijarat ho chali hai
hamin par hai nigah-e-qahr un ki
hamin par ye inayat ho chali hai
marasim ḳhub-ruon se baḌhana
dil-e-nadan ki aadat ho chali hai
karam hone laga ahl-e-havas par
ilahi kya qayamat ho chali hai
vafa par to na jaane kya ho ‘sabir’
jafa hi par ‘masarrat’ ho chali hai
Leave a Reply