Tapti Hui Rahon Pe Phiraya Mujhe Din-Bhar

taptī huī rāhoñ pe phirāyā mujhe din-bhar

yuuñ tere tasavvur ne satāyā mujhe din-bhar

dil meñ vo kasak chhoḌ gayā sub.h kā taarā

ik lamha bhī ārām na aayā mujhe din-bhar

vīrān bayābāñ meñ kabhī ujḌe gharoñ meñ

phirtā rahā le kar tirā saayā mujhe din-bhar

detī rahī ye chāñdnī shab-bhar mujhe āvāz

sūraj ne bhī rah rah ke bulāyā mujhe din-bhar

har samt bhare shahr the kyā jāniye phir bhī

tanhā.ī ke ehsās ne khāyā mujhe din-bhar

lahje meñ ghanī chhāñv ke pattoñ kī zabāñ meñ

peḌoñ ne tirā haal sunāyā mujhe din-bhar

ik pal meñ hī batlā ga.iiñ dam toḌtī kirneñ

vo raaz jo ai ‘shām’ na paayā mujhe din-bhar

Leave a Comment