Nind Se Jagi Hui Aankhon Ko Andha Kar Diya

Sarmad Sahbai

niind se jaagi hui ankhon ko andha kar diya

dhund ne shaffaf a.inon ko dhundla kar diya

joḌta rahta huun TuuTe rabton ka fasla

mujh ko lamhon ke sarabon ne akela kar diya

chiḳhta phirta hai saḌkon par sadaon ka hujum

kis ḳhamoshi ne gali-kuchon ko bahra kar diya

har sada Takra ke behis ḳhamushi se gir paḌi

har sada ne ḳhamushi ko aur gahra kar diya

ham ne phir shaffaf raston par bicha.i aankh aankh

ham ne phir a.ina-e-dil reza reza kar diya

ham ne pahna.e hain ḳhvahish ko ragon ke pairahan

us ne mangi buund ham ne ḳhuun dariya kar diya

shahr ki betab galiyon ne ugal Daale hain log

kis ne mere shahr men murdon ko zinda kar diya

jam ga.e divar-o-dar par gunjte lafzon ke naqsh

ek hangame ne saara shahr gunga kar diya

aankh men dhundla gaya nikhre hue chehron ka rang

jagmagate a.inon ko kis ne maila kar diya

ek ik chehre pe ‘sarmad’ paḌ ga.i shak ki lakir

jaane kis bad-ruh ne logon pe saaya kar diya