ik dusre men Duub ke ham paar ho ga.e
is baar yuun mile hain ki sarshar ho ga.e
vaise shurua men hamen dushvariyan huiin
phir us ke ba.ad ham bhi adakar ho ga.e
is jism ko tavajjoh ka fuqdan le gaya
tum ne chhua nahin hai to mismar ho ga.e
kal ka kise pata magar itna zarur hai
ham log zehni taur pe tayyar ho ga.e
dariya na duriyon ka kabhi paar ho saka
kashti men paanv rakhte hi bedar ho ga.e
miTTi ke saath zehn ko bhi kuchh numu mili
barish hui to thoḌe se ash.ar ho ga.e
Leave a Reply