Zafar Iqbal
kis na.e ḳhvab men rahta huun Duboya hua main
ek muddat hui jaaga nahin soya hua main
meri suraj se mulaqat bhi ho sakti hai
sukhne Daal diya ja.un jo dhoya hua main
mujhe bahar nahin saman ke andar DhunDo
mil bhi sakta huun kisi shai men samoya hua main
bazyabi ki tavaqqo hi kisi ko nahin ab
apni duniya men huun is tarha se khoya hua main
shaam ki aḳhiri aahaT pe dahalta hua dil
sub.h ki pahli havaon men bhigoya hua main
asman par koi konpal sa nikal a.unga
sal-ha-sal se is ḳhaak men boya hua main
kabhi chahun bhi to ab ja bhi kahan sakta huun
is tarah se tire kanTe men piroya hua main
mere kahne ke liye baat na.i thi na koi
kah ke chup hoga.e sab log to goya hua main
muskurate hue milta huun kisi se jo ‘zafar’
saaf pahchan liya jaata huun roya hua main
Leave a Reply