ye kis ke khauf ka galiyon men zahr phail gaya
ki ek naash ke manind shahr phail gaya
nahin giraft men ta-hadd-e-khak ka manzar
simat gaiin miri banhen ki dahr phail gaya
tujhe qarib samajhte the ghar men baithe hue
tiri talash men nikle to shahr phail gaya
main jis taraf bhi chala jaun jaan se jaun
bichhad ke tujh se to lagta hai dahr phail gaya
makan makan se nikla ki jaise baat se baat
misal-e-qissa-e-hijran ye shahr phail gaya
bacha na koi tiri dhuup ki tamazat se
tira jamal ba-andaz-e-qahr phail gaya
ye mauj mauj bani kis ki shakl si ‘tabish’
ye kaun duub ke bhi lahr lahr phail gaya
Leave a Reply