ishq ki umr jab uchhal ki thi
kyuun tamanna tujhe zaval ki thi
do-taka tha mire javab ka mol
dhuum har su tire saval ki thi
dil jo tuuta to yaad aaya hamen
chiiz ye kitne dekh-bhal ki thi
tha bada hijr ka malal magar
kya karun baat hi malal ki thi
achchhe din vo bhi ab miyan jaao
ye kahani to pichhle saal ki thi
saath le aaya apne khamoshi
aarzu jis ko bol chaal ki thi
manzil-e-marg pa ke khatm hui
uf ke dushvariyan bhi haal ki thi
ham the maghrur naujavan ‘afi’
kuchh akad un men bhi jamal ki thi
Leave a Reply