ye sach hai baham us ki mohabbat bhi nahin thi
aur tark marasim hon ye himmat bhi nahin thi
us shaḳhs ki ulfat men giraftar ye dil tha
jis shaḳhs ko chhune ki ijazat bhi nahin thi
kuchh zaḳhm-e-tamanna ko na tha shauq-e-mudava
kuchh us ko masiha.i ki aadat bhi nahin thi
the rah-e-mohabbat men paḌav ka.i lazim
kya kijiye rukna miri fitrat bhi nahin thi
jo ḳhvab-e-shikasta ko ata hausla karti
hasil vo junun-ḳhez rifaqat bhi nahin thi
har-chand ki afsos bichhaḌne ka hamen tha
lekin milen ham phir kabhi hasrat bhi nahin thi
vahshat men charaghan men tire qurb se karta
afsos mayassar ye suhulat bhi nahin thi
kuchh raste dushvar manazil ke the aur kuchh
jazbon men ‘ḳhayal’ apne sadaqat bhi nahin thi
Leave a Reply