vahi hai vahshat vahi hai nafrat akhir is ka kya hai sabab
insan insan bahut rata hai insan insan banega kab
ved upnishad purze purze giita quran varaq varaq
ram-o-kirishn-o-gautam-o-yazdan zakhm-rasida sab ke sab
ab tak aisa mila na koi dil ki pyaas bujhata jo
yuun mai-khana-chashm bahut hain bahut hain yuun to saqi-lab
jis ki tegh hai duniya us ki jis ki lathi us ki bhains
sab qatil hain sab maqtul hain sab mazlum hain zalim sab
khanjar khanjar qatil abru dilbar haath masiha hont
lahu lahu hai sham-e-tamanna aansu aansu subh-e-tarab
dekhen din phirte hain kab tak dekhen phir kab milte hain
dil se dil ankhon se ankhen haath se haath aur lab se lab
zakhmi sarhad zakhmi qaumen zakhmi insan zakhmi mulk
harf-e-haq ki salib uthae koi masih to aae ab
Leave a Reply