Habib Jalib
phir dil se aa rahi hai sada us gali men chal
shayad mile ghazal ka pata us gali men chal
kab se nahin hua hai koi sher kaam ka
ye sher ki nahin hai faza us gali men chal
vo baam o dar vo log vo rusva.iyon ke zaḳhm
hain sab ke sab aziiz juda us gali men chal
us phuul ke baghair bahut ji udaas hai
mujh ko bhi saath le ke saba us gali men chal
duniya to chahti hai yunhi fasle rahen
duniya ke mashvaron pe na ja us gali men chal
be-nur o be-asar hai yahan ki sada-e-saz
tha us sukut men bhi maza us gali men chal
‘jalib’ pukarti hain vo shola-nava.iyan
ye sard rut ye sard hava us gali men chal
Leave a Reply