Poet
tira yaqin huun main kab se is guman men tha
main zindagi ke baḌe saḳht imtihan men tha
shajar shajar miri aamad ka muntazir mausam
main barg-e-gul sa havaon ki ik uḌaan men tha
paTak ke toḌ diya jis ne nisha-e-jan ko
men ju-e-shir sa pinhan usi chaTan men tha
andheri raat men samt-e-sada pe chhoḌ diya
havas ka tiir jo us jism ki kaman men tha
uTha saka na main dast-e-tahi se patthar bhi
mata-e-ghair sa vo kanch ki dukan men tha
ye daur-e-ilm-o-hunar is ko paḌh nahin paaya
sahifa dil ka mira jaane kis zaban men tha
Leave a Reply