use na milne ki socha hai yuun saza denge
har ek jism pe chehra vahi laga denge
hamare shahr men shaklen hain be-shumar magar
tire hi naam se har ek ko sada denge
ham aftab ko ThanDa na kar sake ai zamin
ab apne saa.e ki chadar tujhe oḌha denge
bhula.e baiThe hain jis ko ham ek muddat se
gar us ne puchh liya to javab kya denge
badan samet agar vo kabhi jo aa jaa.e
badan ko us ke badan apna ba-ḳhuda denge
Leave a Reply