ye karam darvesh ne ik pal men mujh par kar diya
multafit nazron se dekha aur tavangar kar diya
ḳhush-mizaji to miri fitrat men shamil thi magar
us ki baton ne mujhe aape se bahar kar diya
ab to hasrat se mujhe takne lagin uncha.iyan
ḳhaksari ne miri mujh ko qad-avar kar diya
ab to bas qismat men likkhi hai bayabanon ki ḳhaak
justuju ne us ki mujh ko ghar se be-ghar kar diya
ghair ka shikva gila kis se karun ab main ‘asar’
mere apnon hi ne mera jiina dubhar kar diya
Leave a Reply