Taimur Hasan
utaar lafzon ka ik zaḳhira ghazal ko taaza ḳhayal de de
ḳhud apni shohrat pe rashk aa.e suḳhan men aisa kamal de de
sitare tasḳhir karne vaala paḌosiyon se bhi be-ḳhabar hai
agar yahi hai uruj-e-adam to phir hamen tu zaval de de
tiri taraf se javab aa.e na aa.e parva nahin hai is ki
yahi bahut hai ki ham ko yarab tu sirf izn-e-saval de de
hamari a.ankhon se ashk Tapken labon pe muskan dauḌti ho
jo ham ne pahle kabhi na paaya tu ab ke aisa malal de de
kabhi tumhare qarib rah kar bhi duriyon ke azaab jhelen
kabhi kabhi ye tumhari furqat bhi ham ko lutf-e-visal de de
Leave a Reply