Saleem Fauz
sukut baḌhne laga hai sada zaruri hai
ki jaise habs men taaza hava zaruri hai
phir is ke ba.ad har ik faisla sar ankhon par
magar gavah ka sach bolna zaruri hai
bahut qarib se kuchh bhi na dekh paoge
ki dekhne ke liye fasla zaruri hai
tum apne baare men mujh se bhi puchh sakte ho
ye tum se kis ne kaha aa.ina zaruri hai
gurez-pa.i ke mausam ajiib hote hain
safar men koi mizaj-ashna zaruri hai
havala maang raha hai miri mohabbat ka
jo ‘fauz’ mujh se ye kahta tha kya zaruri hai
Leave a Reply