Sagheer Malal
kyuun har uruuj ko yahan aḳhir zaval hai
sochen agar to sirf yahi ik saval hai
bala-e-sar falak hai to zer-e-qadam hai ḳhaak
us be-niyaz ko mira kitna ḳhayal hai
lamha yahi jo is ghaḌi aalam pe hai muhit
hone ki is jahan men tanha misal hai
aḳhir hui shikast to apni zamin par
apne badan se mera nikalna muhal hai
suraj hai raushni ki kiran is jagah ‘malal’
vus.at men ka.enat andhere ka jaal hai
Leave a Reply