Riyaz Latif
mire simTe lahu ka isti.ara le gaya koi
mujhe phaila gaya har-su kinara le gaya koi
bas ab to mangta phirta huun apne aap ko sab se
miri sanson men jo kuchh tha vo saara le gaya koi
badan men jo ḳhalaon ka nagar tha vo bhi ḳhali hai
miri tahzib ka tanha manara le gaya koi
jahan se bhaag nikla tha vahin patthar hua aḳhir
mujhe sanson ki sarhad tak dobara le gaya koi
azal se ab talak mujh ko ishare kar raha tha jo
shab-e-na-ashna se vo sitara le gaya koi
Leave a Reply